Nesta actividade prepararemos unha imaxe contrapublicitaria que completaremos e entregaremos despois. Para iso, cumprirá identificar a contrapublicidade e mais as súas posibilidades.
A contrapublicidade é un exercicio de crítica ás empresas que amosan unha realidade deformada e/ou realizan prácticas abusivas. Globalmente, a denuncia da publicidade -entendida como motor dun consumo de consecuencias sociais e ecolóxicas de extrema gravidade- implica o rexeitamento do modelo económico dominante e a aposta por unha sociedade máis xusta.
A mensaxe contrapublicitaria créase fundamentalmente de dúas formas:
1. Modificando os anuncios da marca. Aprovéitanse as campañas que esta realiza e manipúlanse os elementos visuais e/ou de texto para trasladar a denuncia.
2. Deseñando unha campaña orixinal. Neste caso, empréganse as mesmas técnicas que os denunciados, mais cun contido crítico.
Cómpre diferenciar a contrapublicidade da propaganda, pois esta procura difundir ideas políticas, morais ou sociais ou ben valores culturais. A propaganda informa e pretende crear conciencia para modificar condutas. Os anuncios da actividade 1 son un exemplo no ámbito sociolingüístico, así como as campañas de educación vial, de conservación do medio, contra a discriminación, etc.
Onde está?
Imos localizar un anuncio determinado dos de abaixo. Para iso, hai que atender as indicacións de escolla seguintes.
- Aparecen mesturadas imaxes de propaganda (publicidade social) e de contrapublicidade. Quedádevos con estas últimas.
- Entre os carteis contrapublicitarios, hai uns que teñen como obxectivo determinadas empresas e outros, en cambio, poñen en cuestión políticas públicas, o modelo económico ou hábitos sociais. Os que nos interesan son os primeiros.
- Por último, dentro dos que seleccionamos aprécianse diferentes niveis de elaboración: manipulación do nome e/ou do logo do produto unicamente, modificación da imaxe orixinal mantendo o nome ou o slogan (que dese xeito se interpreta), etc. Identificade o anuncio que engade imaxes sobre o orixinal sen modificar a marca e lembrádeo.
Á CONTRA
Actividade 6
Que nos interesa?
Escollede unha das seguintes empresas e asociádea xa coas responsabilidades sociais que se lle atribúen desde medios independentes. Esa marca elixida vai ser o voso obxectivo.
- MCDONALD'S : Traballo infantil e explotación en empresas provedoras, así como consumo de carne con consecuencias ecolóxicas e sociais moi negativas.
- NIKE, ADIDAS: Explotación, traballo infantil, acoso sexual e outras irregularidades en empresas provedoras.
- NESTLÉ: Comercialización de alimentos para bebés mediante métodos condenados internacionalmente e mais explotación de traballadores agrícolas a través dos provedores de materias primas.
- MITSUBISHI: Destrución de selvas tropicais.
- MERCEDES BENZ: Tráfico de armas nucleares e minas antipersoas a través dunha empresa filial.
- SHELL: Financiamento de guerra civil e tráfico de armas, así como destrución do sustento vital en rexións petrolíferas ou colaboración con ditaduras militares.
- BAYER: Importación de materias primas desde rexións con conflitos bélicos, financiamento de ensaios clínicos non éticos, atrancos á fabricación e comercialización de medicamentos vitais ou comercio de perigosos herbicidas.
- INDITEX-ZARA, EL CORTE INGLÉS, MANGO... : traballo infantil e explotación dos traballadores, de maneira inhumana a través dos talleres en Marrocos, Indonesia, Bangladesh, etc.
Como elaborar a contra?
Tomando o cartel identificado en "Onde está?" como modelo, prepararedes o voso deste xeito:
- Localizade unha imaxe dun anuncio publicitario desa empresa - marca. Se se escollese o primeiro caso, valería por exemplo esta.
- Aplicádelle modificacións (como elementos engadidos, deformacións...) que amosen as consecuencias da política comercial da empresa, que poñan en evidencia as características ficticias coas que se intenta facer máis desexábel o produto ou que destaquen os aspectos negativos que un anuncio nunca mostra. Empregade un editor de imaxes do computador ou un en liña (Pixlr, por exemplo).
- Se é posíbel, manipulade o seu nome.
(O slogan traballarémolo despois)
Gardade a imaxe nun lugar seguro (pode ser na rede), pois haberá que empregala na actividade seguinte, mais agora non se entrega.